Шулук «Бүзээлелдиң кара хлеви» Чечена Монгуш

Бүзээлеткен Ленинградка
Бузундулар аразынга
Үш чыл ажыг хоорайдан
Үнер-кирер аргазы чок,

Төөгүге туруп көрбээн
Тос чүс ажыг хонук ишти
Куржаглаткаш дайызынга
Куруг арткан хоорайга

Ижер-чиири чок-даа болза,
Идегелин чер-ле салбаан
Аш-чут үзе шаварга-даа
Аңаа чер-ле торулбайн,

Эжелекчи фашистерге
Эргим ынак хоорайын
Эчизинге чедир бербээн
Эң-не ховар маадырларны,

Көк-тараага сыскындыны
Холуп тургаш быжырып каан,
Саазынзыг кескинди хлеб
Сая чоннуң тынын алган.

Хүнде чүгле чаңгыс катап
Хүнезинге ону үлээр.
Тодар чүве кайда-даа чок
Дора өлбес аргазы-дыр.

»Амыдырал оруу» диртип
Адай берген Ладож хөлден
Ада-чурттан ажык-дуза
Арат-чонга кышкы өйде

Хүнүң-даңның эвес-даа бол,
Хүнезинни кызып эккеп
Хей-аъттарын көдүргүлеп
Хензиг-даа бол өөртүп турган.

Чывар-соокту, аш-чутту,
Фашистерниң бомбазын
Чылдар ишти шыдажыпкан
Маадырлыг Ленинградтың

Улуг-биче чурттакчызын
Ам-даа сактып.шупту бистер
»Үлегерлиг маадырлар» деп
Алгап-мактап, йөрээп чор бис.

Ада-чуртту камгалаарда
Арат-чоннуң тынын алган
Амыдырал дөзү болган
Азарганчыг кескинди хлеб…

Чечена Монгуш 24.01.21ч